Gruaja pranon propozimin për martesë pas 43 përpjekjeve

Një histori dashurie e pazakontë ka tronditur shumë njerëz, pasi një burrë i vendosur e bëri një propozim për martesë 43 herë, dhe pas shtatë vitesh dhe 42 refuzimeve, e dashura e tij më në fund tha “po”.

Luke Wintrip, 36 vjeç, kishte dashur të martohej me Sarah Wintrip, 38 vjeç, që nga viti 2018. Megjithatë, pavarësisht përpjekjeve të tij të shumta, Sarah kishte refuzuar çdo herë deri në propozimin e tij të 43-të, kur më në fund e pranoi.

Në një prononcim për mediat, Sarah tregoi se fillimisht, pas shtatë vjetësh lidhje dhe disa propozimeve, ajo kishte qenë e pavendosur për t’u lidhur në një martesë për shkak të eksperiencave të kaluara dhe shqetësimeve për fëmijët e saj.

Sarah: “Nuk e prisja. E doja, por nuk doja t’i thoja ‘po’. Doja të sigurohesha me fëmijët dhe gjithçka që po ndodhte se ishte e drejtë. Luke tha ‘në rregull, mirë, por do të vazhdoj të të pyes’.”

Për shtatë vjet, Luke i kishte bërë Sarah propozime madhështore, duke përfshirë darka romantike dhe udhëtime të veçanta si udhëtimet me kalë në plazhin xhamajkan dhe marrjen me qira të një kështjelle në Pragë.

Pas përpjekjes së tij të 42-të, Sarah e ngacmoi duke thënë: “Herën tjetër, do të them po”.

Ndërkohë, Luke vazhdoi të bënte përpjekje për të fituar zemrën e saj dhe një vit më vonë e çoi në Greenwich, Londër, një vend simbolik për matjen e kohës dhe navigimin, shtëpia e Observatorit Mbretëror.

Kur i propozoi martese, ai tha: “Kjo është qendra e botës dhe ti je qendra e botës sime dhe dua që të martohesh me mua.”

Sarah: “Më në fund ai fitoi zemrën time. Mendoj se ndoshta duhet të fitojë një Rekord Botëror Guinness. Jam mirënjohëse që ai këmbënguli për kaq gjatë.”

Çifti tani është martuar dhe historia e tyre është një shembull i dashurisë dhe qëndresës, duke treguar se shpesh dashuria kërkon kohë dhe durim./Periskopi/