Kate Middleton dhe Princesha Charlotte surprizojnë me duet në piano në shërbesën e Krishtlindjes

Princesha e Uellsit, Kate Middleton, dhe vajza e saj, Princesha Charlotte, kanë realizuar një paraqitje surprizë për Krishtlindje, duke interpretuar së bashku në piano gjatë shërbesës tradicionale të këngëve të Krishtlindjes.

Dueti u transmetua të mërkurën në mbrëmje në hapjen e shërbesës vjetore “Together at Christmas”, e organizuar nga Kate dhe e mbajtur në Westminster Abbey.

Kate dhe Charlotte interpretuan veprën Holm Sound të kompozitorit skocez Erland Cooper, një pjesë muzikore që, sipas pallatit mbretëror, ato e praktikojnë shpesh së bashku në shtëpi. Cooper ishte i pranishëm gjatë xhirimeve dhe u ofroi udhëzime gjatë regjistrimit.

Tema qendrore e edicionit të pestë të shërbesës ishte rëndësia e dashurisë dhe solidaritetit. Në një letër drejtuar të pranishmëve, Kate theksoi vlerën e “akteve të thjeshta të kujdesit” në kohë pasigurie.

Kjo nuk është hera e parë që Kate shfaqet si pianiste në këtë event, pasi në vitin 2021 kishte interpretuar së bashku me këngëtarin Tom Walker./Periskopi