DJ me famë botërore Fatboy Slim vjen në Prishtinë: Dua Lipa më bindi të vija në “Sunny Hill”, me Rita Orën kam një lidhje të veçantë

DJ-i legjendar britanik Fatboy Slim (emri i vërtetë Norman Cook) ka arritur të premten në Aeroportin Ndërkombëtar të Prishtinës, ku është pritur për natën e parë të festivalit “Sunny Hill” që nisi të premten në Prishtinë.

Artisti me famë botërore, i njohur për super-hitet si “Praise You” dhe së fundmi për bashkëpunimin me Rita Orën në versionin e ri të kësaj kënge.

Ai foli me humor, sinqeritet dhe entuziazëm për vizitën e tij të parë në Kosovë në një intervistë të shkurtër për Telegrafin, transmeton Periskopi.

“Është shumë bukur të jem këtu. Faleminderit Duas për ftesën”, tha ai menjëherë pas mbërritjes.

Kur u pyet se çfarë e bindi të pranojë ftesën për të qenë pjesë e line-up-it të këtij viti në festivalin “Sunny Hill”, përgjigjja e tij ishte e menjëhershme: “Kur më ftoi Dua Lipa, isha thjesht i shitur”.

I pyetur nëse do të dëshironte një bashkëpunim me Duan në të ardhmen, Fatboy Slim, mes të qeshurave, tha: “Nuk e di për këtë… ndoshta më mirë ta shijoj nga larg”.

Por për një tjetër shqiptare të famshme, Rita Orën, ai kishte vetëm fjalë të mira dhe një lidhje më të afërt: “Ishte kënaqësi të punoja me të. U takuam në festivalin ‘Glastonbury’, dhe ajo më tha se donte të bënim diçka bashkë – dhe gjithçka nisi të rrjedhë vetvetiu nga aty. Ajo është një vajzë shumë e mirë… dhe po, me të u afrova më shumë se me Duan”.

Megjithëse nuk e kishte njoftuar Ritën se po vinte në vendlindjen e saj, ai tha me humor: “Nuk e kam parë kohëve të fundit, por besoj se do të më vijë ndonjë mesazh sot pasdite për të më uruar fat”.

Ai konfirmoi gjithashtu se megjithëse fillimisht nuk kishte planifikuar ta përfshinte hitin “Praising You” në setlistën e mbrëmjes, ndoshta do të ndryshonte mendje pak para performancës: “Ndoshta do të bëj një ndryshim të vogël në makinë dhe do ta fus. Po, ndoshta”.

Për publikun shqiptar, mesazhi i tij i fundit ishte i thjeshtë dhe i gëzueshëm: “Faleminderit të gjithëve që na keni pritur. Dhe nëse vini sonte – sillni këmbët për vallëzim!”.

Fatboy Slim do të performojë sonte në skenën C4 të “Sunny Hill Festival” – me një show që pritet të ndezë atmosferën në hapjen e edicionit të sivjetmë në Bërnicë të Poshtme, në Prishtinë. /Periskopi