Pamje mbresëlënëse nga nata e parë e Sunny Hill, mijëra njerëz ndjekin Dua Lipën në një spektakël historik

Një det njerëzish, një energji e papërshkrueshme dhe një atmosferë që rrallëherë përjetohet në këtë nivel, këto janë pamjet e mbrëmjes së parë të Sunny Hill Festival, ku mijëra pjesëmarrës u mblodhën për të ndjekur performancën spektakolare të yllit botëror, Dua Lipa.

Fotografia ajrore që ka qarkulluar gjerësisht në rrjetet sociale, tregon qartë një numër të jashtëzakonshëm pjesëmarrësish, që kanë mbushur çdo cep të zonës së festivalit.

Foto: Screenshot (Arben Llapashtica – FaceBook)

Nata e parë e festivalit, e cila shënoi edhe rikthimin e shumëpritur të Dua Lipës në Prishtinë, rezultoi të jetë një ndër më të mëdhatë dhe më emocionueset që ka përjetuar ndonjëherë ky event.

Performanca e saj, që zgjati përreth dy orë, u shoqërua me një produksion teknik të nivelit më të lartë, me koreografi të përsosura, ndriçim magjepsës dhe një setlist që përfshinte hitet më të mëdha të saj, nga “Levitating” deri te “Houdini”, shkruan Telegrafi, transmeton Periskopi.

Reagimet nga publiku ishin të menjëhershme, brohorima, këngë të kënduara në kor dhe emocione të ndjera në çdo moment të koncertit.

@edonisuka0 #fyp #dualipa #sunnyhillfestival #2025 #fyppppppppppppppppppppppp ♬ original sound – edonisuka

Sunny Hill, tashmë i kthyer në një nga festivalet më të mëdha të muzikës në Evropën Juglindore, dëshmoi edhe një herë fuqinë e tij për të bashkuar mijëra njerëz përmes muzikës, kulturës dhe artit.

Kjo ishte vetëm nata e parë. Me një nisje kaq madhështore, pritshmëritë për netët e tjera janë më të larta se kurrë.

Shawn Mendes, i cili do të ngjitet në skenë sonte, pritet të ndezë atmosferën edhe më shumë, duke e vazhduar magjinë që Sunny Hill sjell çdo verë në zemër të Prishtinës./Periskopi