Shoqëria civile dhe AGK në mbështetje të redaktorëve të larguar nga RTK: Të anulohet vendimi

Një numër i madh i organizatave të shoqërisë civile, përfshirë Asociacionin e Gazetarëve të Kosovës (AGK), kanë dalë në mbështetje të gjashtë redaktorëve të Radio Televizionit të Kosovës (RTK), të cilët janë larguar nga drejtimi i emisioneve informative që ata kanë moderuar për një kohë të gjatë.

Gazetarët Blerta Foniqi-Kabashi, Meneta Zekaj-Nushi, Jehona Zhitia, Arton Mulliqi, Edona Musa-Mustafa dhe Valon Bajrami kanë deklaruar se janë larguar nga ekranet “në mënyrë arbitrare dhe antiligjore”. Organizatat vlerësojnë se ky vendim përbën një tjetër ndërhyrje serioze në pavarësinë redaktoriale të transmetuesit publik.

“Largimi i redaktorëve ka ardhur pak kohë pasi ata kanë sfiduar me pyetje përfaqësues të pushtetit në emisionet e tyre, si dhe kanë ngritur shqetësime për vonesat trejavore në pagesat e pagave,” thuhet në reagim. Sipas tyre, këto zhvillime janë tregues të presionit të vazhdueshëm politik mbi RTK-në, i cili, përveç ndërhyrjeve në përmbajtje, është intensifikuar edhe përmes shkurtimit të buxhetit dhe emërimeve politike në menaxhment.

Organizatat kërkojnë nga menaxhmenti i RTK-së që të anulojë vendimin për largimin e redaktorëve nga ekrani dhe çdo vendim i ardhshëm të merret në dialog me ta, duke respektuar kontratat dhe lirinë e tyre profesionale.

“Transmetuesi publik ka rol kyç për informimin e drejtë të publikut dhe stafi i RTK-së duhet të punojë pa presione politike e financiare,” theksohet në reagimin e përbashkët. Organizatat, përfshirë AGK-në, Rrjetin e Grave Gazetare, institucionet hulumtuese dhe mediatike, shprehin përkrahje për redaktorët në ndjekjen e rrugëve ligjore për anulimin e vendimit.

Lista përfshin mbi 20 organizata të shoqërisë civile dhe aktorë të pavarur të cilët shprehin shqetësim të thellë për gjendjen në RTK dhe nxisin transparencë dhe llogaridhënie nga menaxhmenti i këtij institucioni publik.