Barcelonës i kërkohet ta dyfishojë ofertën për sulmuesin 17-vjeçar

Interesimi i Barcelonës për talentin egjiptian Hamza Abdelkarim është bërë publik javët e fundit, por duket se klubi katalanas do ta ketë të vështirë të arrijë një marrëveshje për sulmuesin adoleshent.

Abdelkarim, i cili mbush 18 vjeç javën e ardhshme, është në listën e dëshirave për një transferim në janar, me qëllim përforcimin e skuadrës satelite Barça Atlètic.

Javën e kaluar u bë e ditur se Barcelona kishte paraqitur një ofertë për Al-Ahlyn, e cila mund të arrinte deri në 4 milionë euro. Megjithatë, bëhej fjalë për një huazim me opsion blerjeje, ku vetëm 1 milion euro ishin të garantuara, ndërsa pjesa tjetër ishte e lidhur me objektiva – ofertë që Al-Ahly e ka refuzuar.

Po ashtu, u raportua se Al-Ahly nuk ishte i kënaqur me kushtet e propozuara nga Barcelona dhe duket se mes palëve ekziston ende një hendek i konsiderueshëm në negociata. Sipas Koraplus (përmes Sport), Al-Ahly është i hapur për një huazim deri në verë, por kërkon një opsion blerjeje prej 8 milionë eurosh, nga të cilat 2 milionë të jenë të garantuara – dyfish i ofertës fillestare.

E përditshmja katalanase shton se, të paktën për momentin, Barcelona nuk ka ndërmend të paguajë më shumë se 4 milionë euro për Abdelkarim, duke qenë se ai ende nuk ka lënë gjurmë në futbollin profesionist. Po ashtu, Barcelona është e gatshme të pranojë vetëm 10% të kartonit në rast rishitjeje, ndërsa Al-Ahly kërkon 20% – një pikë që katalanasit e kanë cilësuar si “të panegociueshme”.

Sulmuesi i ri ka tërhequr interes edhe nga Olympique Lyon dhe Bayern Munich, por Abdelkarim duket i vendosur për një kalim te Barcelona. Javën e kaluar u raportua se ai po shtynte fort për këtë transferim, ndërsa tani Fabrizio Romano ka konfirmuar se lojtari tashmë ka dhënë dritën jeshile për kushtet personale.

Barça Atlètic aktualisht garon në kategorinë e katërt, ndërsa Juliano Belletti është ngarkuar me misionin për ta rikthyer ekipin në Primera RFEF. Aktualisht, skuadra vuan mungesën e dy sulmuesve kryesorë, Víctor Barberá dhe Óscar Gistau, për shkak dëmtimesh. Ata ndodhen në vendin e pestë, katër pikë larg liderit Poblense, me vetëm një vend që siguron ngjitjen automatike.