Statistika shqetësuese: Vinicius me rekord negativ te Real Madridi

Real Madrid arriti një fitore të shkëlqyer 3-0 ndaj Manchester City të mërkurën mbrëma, duke hedhur një hap të madh drejt kualifikimit në çerekfinale të Ligës së Kampionëve falë “hat-trick”-ut të Federico Valverdes.

Megjithatë, madrilenët mund të kishin marrë një avantazh edhe më të madh për ndeshjen e kthimit në Etihad Stadium javën e ardhshme.

Pjesën më të madhe të pjesës së dytë Real Madridi ia kushtoi ndaljes së sulmeve të Cityt, por në disa raste arriti të dalë rrezikshëm në kundërsulm. Dhjetë minuta pas fillimit të pjesës së dytë, Vinícius Júnior u rrëzua në zonë nga portieri Gianluigi Donnarumma. Braziliani, në mungesë të disa yjeve të skuadrës, mori përsipër ekzekutimin e penalltisë.

Vinícius goditi ulët në anën e djathtë, por Donnarumma e lexoi drejtimin dhe e priti penalltinë, duke mbajtur gjallë shpresat e vogla të Cityt në këtë përballje. Më vonë, Valverde zbuloi se Vinícius ia kishte ofruar atij penalltinë, por uruguaiani kishte refuzuar ta godiste.

Kjo ndoshta lidhet edhe me statistikat jo shumë të mira të Viníciusit nga pika e bardhë. Sipas raportimeve, kjo ishte penalltia e katërt e humbur në 14 tentativa me Real Madridin, që do të thotë një përqindje realizimi prej 71.43% — më e ulëta ndër ekzekutuesit e rregullt të penalltive të klubit në shekullin XXI, duke marrë parasysh vetëm lojtarët me të paktën 10 tentativa.

Në 26 vitet e fundit, shtatë lojtarë të Real Madridit kanë ekzekutuar të paktën 10 penallti. Rekordin më të mirë e mban Sergio Ramos me 95.65%, pasi humbi vetëm një nga 23 penalltitë. Pas tij vijnë Karim Benzema me 86.49% dhe Cristiano Ronaldo me 87.78%.

Kylian Mbappé, i cili këtë sezon është ekzekutuesi kryesor i penalltive te Real Madridi kur është i gatshëm, ka humbur gjithashtu katër penallti, por nga 23 tentativa, duke pasur një përqindje realizimi prej 82.61%. Ndërkohë, Luis Figo realizoi 31 nga 37 penallti (83.78%), ndërsa Ruud van Nistelrooy ka përqindjen e dytë më të ulët me 73.33%, pasi humbi katër nga 15 goditje.

Pas rikthimit nga lëndimi, Mbappé pritet të marrë sërish përgjegjësinë për penalltitë. Francezi tashmë konsiderohet ylli kryesor në Santiago Bernabéu Stadium dhe përgjegjësia bie mbi të. Megjithatë, “Los Blancos” nuk kanë më të njëjtën siguri nga pika e bardhë si në kohën e Ronaldos dhe Ramosit.