Gjyqi i Diddyt në përfundim, çka rrezikon reperi

Pas gjashtë javësh dëshmi, prokurorët në çështjen e trafikimit seksual kundër Sean “Diddy” Combs kanë përfunduar paraqitjen e provave të tyre kundër tij.

Moguli i muzikës përballet me akuza që përfshijnë aktivitet kriminal në grup dhe trafikim seksual me forcë, mashtrim ose detyrim.

Ai u arrestua shtatorin e kaluar ndërsa ndodhej në Nju Jork dhe ka qëndruar në burg që nga ajo kohë.

55-vjeçari është famëkeq për organizimin e “freak-offs” – festa seksuale ku gratë dyshohet se detyroheshin të kryenin marrëdhënie seksuale me punonjës meshkuj të seksit, ndërkohë që Combs shikonte dhe kënaqte veten.

Combs i ka mohuar të gjitha akuzat kundër tij dhe pretendon se çdo akt seksual ka qenë konsensual.

Në gjyq dëshmuan 34 dëshmitarë, përfshirë ish-partneren e Diddy-t, Cassie Ventura, reperin Kid Cudi dhe ish-punonjës të tij, si dhe menaxherë dhe punonjës hotelesh.

Megjithatë, të martën (24 qershor), Combs refuzoi të flasë në gjykatë ndërsa ekipi i tij ligjor paraqiti mbrojtjen. Seanca zgjati më pak se një orë dhe mbrojtja nuk thirri asnjë dëshmitar.

Duke iu drejtuar gjykatësit federal Arun Subramanian rreth një orë pasi prokuroria përfundoi paraqitjen e saj, siç raportoi ABC News, Combs tha për refuzimin për të dëshmuar: “Kjo është vendimi im me avokatët e mi,” përpara se të përpiqej të fitonte simpatinë e gjykatësit.

“Si ndiheni sot?” e pyeti gjykatësi Subramanian, dhe Combs u përgjigj: “Po ndjehem shumë mirë, po ju, i nderuar?” duke shtuar: “Dua t’ju falënderoj. Po bëni një punë të shkëlqyer.”

Pra, si e mbrojti veten ekipi ligjor i Diddy-t pa e thirrur atë në tribunën e dëshmitarëve apo ndonjë dëshmitar tjetër në mbrojtje?

Ata theksuan mesazhe dashurie të shkëmbyera midis Cassie Ventura-s dhe Combs në vitin 2012, ku Ventura shprehej se ende e donte dhe do të ishte “freak”-u i tij i vogël, raporton Prive, transmeton Periskopi.

Ata gjithashtu lexuan shënime nga intervista të autoriteteve që tregonin se disa nga dëshmitarët kishin ndryshuar versionet nga deklaratat fillestare.

Për më tepër, avokatët e Combs kaluan ditë të tëra duke marrë në pyetje dëshmitarët e prokurorisë, duke u përpjekur të hedhin dyshime mbi dëshmitë e viktimave të supozuara.

Menjëherë pasi prokuroria përfundoi çështjen, avokatët e Combs kërkuan nga gjykatësi Subramanian të japë një “vendim për pafajësi” – duke sugjeruar se edhe nëse provat e prokurorisë konsiderohen më të fortat e mundshme, ato nuk mjaftojnë për të provuar fajësinë përtej çdo dyshimi të arsyeshëm, prandaj çështja duhet të mbyllet që tani.

Gjykatësi Subramanian nuk mori menjëherë një vendim mbi këtë kërkesë.

Kjo është një praktikë standarde në gjyqet federale penale; mocionet për pafajësi, të njohura si mocione sipas Rregullës 29, bëhen zakonisht pas përfundimit të paraqitjes së provave nga prokuroria, dhe sërish pas përfundimit të mbrojtjes.

Gjykatësit zakonisht presin të dëgjojnë argumentet përmbyllëse dhe të shohin të gjitha provat përpara se të vendosin nëse ndonjë juri e arsyeshme mund të arrijë në një dënim ligjërisht të vlefshëm.

Çfarë do të ndodhë më pas në çështjen Diddy?
Të enjten (26 qershor), juria pritet të rikthehet në gjykatë për të dëgjuar argumentet përmbyllëse.

Kjo do të thotë se diskutimet – kur juria të tërhiqet për të diskutuar argumentet dhe për të arritur një vendim unanim – mund të nisin që të premten (27 qershor).

Diskutimet mund të zgjasin nga disa orë deri në disa javë, kështu që ende nuk dihet kur mund të pritet një vendim.

Nëse shpallet fajtor për të gjitha akuzat, Combs mund të përballet me burgim të përjetshëm. /Periskopi/