Dimal Basha i harruar nga partia: Pse si dolën në krah Kurti e Dejona në të mirë e në të keq?

Dimal Bashës më lehtë i vinte t’i akuzonte mediat dhe gazetarët se sa të pranonte faktin se as shefi i parë, Albin Kurti e as e dyta Dejona Mihali nuk i qëndruan krah as në ditën kur u zgjodh kryetar i Kuvendit e as kur iu publikua në media shkrimi skandaloz i tij kundër UÇK-së, shkruan Periskopi.

Pse Vetëvendosje nuk po e përkrah Dimal Bashën?

Të martën kur Dimal Basha mori votat e nevojshme për tu bërë kryetar i Kuvendit, nga Vetëvendosje mbizutëruan duartrokitje prej zori. Shumica e deputetëve të VV mbanin fytyra të ngrysura, por ishte Albulena Haxhiu ajo që I dha një përqafim të ftohtë Bashës, pasi ky i fundit e ftoi që t’i bashkohet si nënkryetare.

Por, që nga ajo ditë Dimal Basha nuk mori urime nga kryetari i Vetëvendosjes, Albin Kurti dhe Dejona Mihali.

Basha u ballafaqua dje e sot me shkrimin skandaloz kundër UÇK në të cilin ishte bashkautor, por as në këtë rast nuk mori mbështetje nga Vetëvendosje.

Ndoshta për këtë, Basha ishte i mbushur sot në konferencë dhe u shfrye duke akuzuar gazetarët dhe mediat në Kosovë.

“Për dy mandate kam bërë beteja të mjaftueshme në këtë Kuvend dhe jashtë tij dhe portalet e shumë të ashtuquajtur gazetarë nuk kanë ndaluar kurrë duke më ofenduar në mënyrë më të ulëta të mundshme, përfshirë këtu edhe duke përdorur burime nga gazetat e Beogradit për të më sulmuar mua. Kjo s’është sot. Të njëjtit e kanë bërë të njëjtën propagandë kundër zv/kryeministres Gërvalla me vite të tëra, vajzën e heroit”, tha Basha mes tjerash në konferencë.