Shefi i NATO-s, Mark Rutte arrin në Shkup

Sekretari i Përgjithshëm i NATO-s, Mark Rutte ka mbërritur në Shkup. Ai është pritur në aeroport nga ministri i Mbrojtjes, Vllado Misajllovski.

Nga aeroporti i Shkupit, shefi i NATO-s së bashku me delegacionin e tij u nisën për në vilën Vodno ku nikoqire e tij do të jetë presidentja e Maqedonisë së Veriut, Gordana Siljanovska-Davkova.

Sekretari i përgjithshëm do të pritet me nderime më të larta shtetërore dhe ushtarake në ceremoni në Kabinetin e presidentes, pas çka do të vijojë edhe takimi. Është paraparë edhe konferencë e përbashkët për shtyp e presidentes së RMV-së dhe Rutte-s, raporton Zhurnal, transmeton Periskopi.

Sekretari i përgjithshëm i NATO-s do të ketë takim edhe me kryeministrin maqedon Hristijan Mickoski, si dhe me kryetarin e Kuvendit, Afrim Gashi, derisa do të mbajë fjalim edhe para deputetëve në Dhomën ligjvënëse./Periskopi