Cilat klube u ‘pasuruan’ nga Kupa e Botës për Klube?

Përpara zhvillimit të turneut të kësaj vere, FIFA kishte konfirmuar se fondi total i çmimeve për këtë edicion do të ishte 1 miliard euro, nga të cilat 525 milionë euro do të ndaheshin për pjesëmarrjen e ekipeve, ndërsa 475 milionë të tjera do të shpërndaheshin bazuar në performancën e tyre gjatë turneut, transmeton telegrafi.

Edhe pse nuk është publikuar zyrtarisht shuma që mori secili klub evropian vetëm për pjesëmarrjen, sipas Sports Business Journal, Chelsea, fituese e turneut dhe PSG, si finaliste, përfituan mbi 100 milionë euro secila, duke arkëtuar respektivisht 85 milionë dhe 75 milionë euro për performancën në garë, plus bonuse shtesë.  

Inter Miami fitoi më shumë se 21 milionë euro pasi arriti deri në fazën e 1/16-ave, ku Lionel Messi dhe shokët e tij u eliminuan nga PSG.  

Ndërkohë, LAFC fitoi 10.55 milionë euro, në sajë të barazimit në fazën e grupeve me Flamengon, ndërsa Seattle Sounders, të cilët humbën të tre ndeshjet e tyre në grup, morën shumën minimale prej 9.55 milionë eurosh.  

Nga Meksika, Pachuca gjithashtu përfitoi 9.55 milionë euro, duke humbur të tre ndeshjet e saj, ndërsa Monterrey, që u kualifikua nga faza e grupeve, barazoi shifrën prej 21 milionë eurosh me Inter Miami.  

Në total, klubet evropiane grumbulluan më shumë se 62 për qind të fondit total të çmimeve, ndërsa klubet nga Amerika e Jugut morën 20 për qind, me Fluminense si kontribuesin kryesor pas arritjes së saj në gjysmëfinale.  

Përfaqësuesi i vetëm nga Oqeania, Auckland City, regjistroi shifrën më të ulët të fitimeve me 4.58 milionë euro, një shumëe konsiderueshme për një klub gjysmë-profesionist nga Zelanda e Re./Periskopi