Youtube tani shikohet më shumë në televizor, mund shikuesit e televizioneve

Një brez që u rrit duke parë YouTubers në tabletë dhe telefona është zhvendosur drejt televizorëve – dhe Hollywood-i po humb terren.

Selia qendrore e burimit më të madh në botë për argëtim me video nuk ka asgjë nga pamja e një studioje të Hollywood-it. Nuk ka postera të emisioneve të njohura, as skenaristë që propozojnë ide, as studio zëri apo turistë.

Por pas revolucionit të videove që shohim në laptop dhe telefon, YouTube tani është mbreti i territorit kryesor të Hollywood-it: televizorit.

YouTube u bë ofruesi më i shikuar i videove në televizione në SHBA në fillim të këtij viti dhe përparësia e tij vetëm është rritur, sipas të dhënave të Nielsen. Tani njerëzit e shikojnë YouTube në televizor më shumë sesa në telefona apo pajisje të tjera — mesatarisht më shumë se një miliard orë çdo ditë. Kjo është më shumë sesa përfiton Disney nga rrjeti i tij televiziv, kanalet kabllore dhe tre platformat streaming së bashku.

Si përgjigje, influencerët, producentët dhe interpretuesit e YouTube — të njohur kolektivisht si “krijues” — po krijojnë video më të gjata dhe me cilësi më të lartë, që i përshtaten familjeve dhe grupeve miqsh që shikojnë bashkë në dhomat e ndenjes. YouTube po përmirëson gjithashtu shpejt aplikacionin e tij për televizor, duke shtuar funksione të reja për të mbajtur përdoruesit sa më gjatë para ekranit. (Veçmas, ai shet edhe “YouTube TV”, një paketë me kanale që kushton 83 dollarë në muaj.)

Në stilin tipik të Silicon Valley, kompania në pronësi të Google nuk synon vetëm ta ruajë epërsinë në televizorë, por të dominojë të ardhmen e argëtimit.

“Qëllimi ynë është që aplikacioni i YouTube të jetë porta hyrëse për shumicën e përmbajtjes video që ekziston në internet,” – thotë Christian Oestlian, menaxher produkti për televizionin në YouTube. Një nga idetë që kompania po shqyrton është ofrimi i përmbajtjes së personalizuar, si p.sh. përmbledhje nga lojtarët e një fantasy football.

Për pjesën më të madhe të 20 viteve që kur u themelua, YouTube shihej si alternativë e lirë ndaj televizionit – një shtëpi për video të thjeshta si truket me skateboard apo video “si të bësh”, që Hollywood-i i shihte si shpërqendrim nga argëtimi i “vërtetë”.

YouTube nisi si faqe për video në kompjuterë. U fut në televizorë më 2010, por ndërfaqja ishte e papërshtatshme. Deri në vitet 2020, një brez që ishte mësuar të shikonte video në telefon filloi t’i shikojë në dhomën e ditës me partnerët ose fëmijët. Dhe ndërkohë që Netflix dhe Disney+ rritën çmimet, YouTube mbeti falas.

Kjo e shndërroi atë në një gjigant mediatik. Analistët e MoffettNathanson vlerësojnë se të ardhurat e YouTube vitin e kaluar ishin 54.2 miliardë dollarë, duke e renditur të dytin pas Disney-t.

Vendimet që marrin drejtuesit e YouTube mbi dizajnin e aplikacionit apo algoritmin kanë efekte të mëdha në kulturën pop globale.

Kurt Wilms, që u bë drejtor i lartë i produktit për televizorët në YouTube më 2018, e ktheu aplikacionin nga një mjet për kërkime të thjeshta në një përvojë të ngjashme me telefonin: rekomandime të personalizuara, abonime, komente, reklamë të përshtatur për TV, dhe kontroll përmes telekomandës.

Një funksion i ardhshëm i quajtur “shows” do të lejojë YouTube të shfaqë automatikisht episodin tjetër të një kanali, duke krijuar sezona të plota për herë të parë — ashtu si Netflix.

Njerëzit shikojnë jo vetëm individë që luajnë videolojëra ose flasin për jetën e tyre personale, por gjithnjë e më shumë edhe shfaqje komedi, dokumentarë, animacion dhe talk-show, që dikur ishin ekskluzivisht në TV.

“Good Mythical Morning” është një shembull klasik. Prej gati 20 vitesh, Rhett & Link e kanë kthyer kanalin e tyre me 19.3 milionë abonentë në një studio me mbi 100 të punësuar jashtë L.A. Emisioni është bërë më i ndjekur në TV që nga fundi i 2023-s dhe përbën 53% të shikimeve të tyre.

E njëjta gjë ndodhi me “Hot Ones” dhe me videot edukative për fëmijë të Dhar Mann Studios, që tani shikohen më së shumti në TV.

Të dhënat tregojnë se koha mesatare e shikimit të videove të gjata (15+ minuta) është rritur ndjeshëm, dhe më së shumti kjo ndodh në televizor. Kjo është e dobishme edhe për krijuesit, sepse YouTube ndan 55% të të ardhurave nga reklamat me ta — dhe reklamat që vendosen në mes të videove (“mid-rolls”) janë më fitimprurëse.

P.sh., komedianja Quenlin Blackwell, që dikur bënte video 10-30 minuta me miqtë, tani realizon video mbi 1 orë me ekip profesional.

YouTube nuk përzgjedh përmbajtjen që do të krijohet. Përpjekja e saj për të zhvilluar seriale origjinale më 2015 dështoi, me përjashtim të “Cobra Kai” që u bë hit vetëm pas kalimit në Netflix.

Tani, përmbajtja “Hollywood-iane” vjen nga partnerë që shesin abonime brenda aplikacionit të YouTube, si HBO Max, Paramount, etj.

YouTube ka investuar në të drejtat e sporteve, si NFL Sunday Ticket, që nga 2023 është ekskluzivisht në YouTube dhe kushton 378-480 $ në sezon. Tani YouTube po teston edhe transmetimin falas të ndeshjeve me reklama si burim fitimi.

Platforma do të transmetojë një ndeshje NFL falas në shtator dhe po eksperimenton me veçori si “multi-view” (disa ndeshje në një ekran) dhe komentatorë influencer.

“50% e shikuesve kanë thënë se preferojnë të mësojnë për një event të drejtpërdrejtë nga një krijues YouTube sesa ta shikojnë vetë,” – shton Oestlian.

Krijuesit më të njohur të YouTube janë kthyer në pasuri strategjike. Wells Fargo ka sugjeruar që Netflix të investojë 500 milionë dollarë për t’i marrë disa nga krijuesit më të mëdhenj të YouTube.

Disa si MrBeast dhe Ms. Rachel po bashkëpunojnë me Amazon dhe Netflix, por nuk pranojnë të braktisin kanalet e tyre në YouTube.

“Qëllimi nuk është të mundësh YouTube,” thotë drejtori i Dhar Mann Studios.
“Ajo lojë është fituar tashmë.”/WSJ