Vdes vokalisti i parë i grupit “Iron Maiden”, Paul Mario Day

Paul Mario Day, muzikanti britanik, i njohur më së miri si këngëtari kryesor i grupit “Iron Maiden”, ka ndërruar jetë në moshën 69-vjeçare.

Konkretisht, lajmi për vdekjen u konfirmua nga familja e tij, duke deklaruar se vdiq në shtëpinë e tij në Australi.

Edhe pse shkaku i vdekjes nuk është njoftuar zyrtarisht, dihet se Paul Mario Day ka luftuar me kancerin vitet e fundit.

Paul iu bashkua grupit në dhjetor 1975, në moshën 19 vjeçare. Megjithatë, angazhimi i tij zgjati vetëm dhjetë muaj, pasi grupi filloi të merrte kritika se atij i mungonte energjia dhe karizma, gjë që përfundimisht çoi në largimin e tij.

Gjithashtu, në një intervistë të vitit 2019, Day kujtoi fillimet e grupit: “Kur këndova në Iron Maiden, grupi ishte i ri dhe performonte në bare, ku pothuajse askush nuk donte t’i shikonte ose t’i dëgjonte. Ne ishim anonimë dhe përpiqeshim të bënim muzikë të mirë, duke luftuar për çdo shfaqje dhe audiencë”.

Paul Mario Day deklaroi pasi u largua nga grupi se ishte bashkëshkrues i këngës “Strange World” nga albumi debutues i “Iron Maiden” në vitin 1980, por nuk iu dha zyrtarisht merita për të.

Pas kësaj, në vitin 1980 ai themeloi grupin “More”, me të cilin publikoi albumin “Warhead” në vitin 1981.

Midis viteve 1983 dhe 1984 ai ishte lideri i grupit Wildfire, dhe në vitin 1985 arriti suksesin e tij më të madh komercial kur iu bashkua grupit “Sweet”.

Paul Mario Day u zhvendos në Australi gjatë viteve 1980, ku jetoi deri në vdekjen e tij.