Barcelona i nis kontaktet me agjentin e Bastonit

Barcelona vendosi verën e kaluar të mos e zëvendësojë Iñigo Martinezin, pasi mbrojtësi bask u transferua në Arabinë Saudite, duke llogaritur te njëri prej Ronald Araújo ose Andreas Christensen për të mbushur boshllëkun.

Megjithatë, duket se një nga repartet që klubi ka vendosur ta forcojë verën e ardhshme, nëse financat e lejojnë, është mbrojtja.

Gjigantët katalanas kanë shqyrtuar disa opsione gjatë muajve të fundit dhe Hansi Flick ka provuar gjithashtu zgjidhje të ndryshme. Faktoi që Gerard Martín ka stabilizuar situatën në javët e fundit ka ulur shqetësimin për këtë çështje, me disa që sugjerojnë se Barcelona mund të shikojë madje edhe një lëvizje në afatin kalimtar të janarit.

Një nga lojtarët që i ka bindur më së shumti, si një opsion me këmbë të majtë në qendër të mbrojtjes, është ylli i Interit, Alessandro Bastoni. Sipas Sport, Barcelona u impresionua nga ai sezonin e kaluar gjatë gjysmëfinales së Ligës së Kampionëve mes dy skuadrave, dhe ai spikat për udhëheqjen e repartit mbrojtës. Klubi katalanas ka kontaktuar gjithashtu me agjentët e tij për të testuar mundësinë e një transferimi.

Megjithatë, gazeta katalanase shpjegon se nga informacionet e marra, Barcelona ka arritur në përfundimin se realizimi i një marrëveshjeje për Bastonin do të ishte i pamundur. Reprezentuesi italian ka kontratë deri në vitin 2028 dhe Interi do të kërkonte një shumë shumë të lartë për të shqyrtuar shitjen e tij.

Deri tani, dy emrat që janë lidhur më së shumti me Barcelonën janë Marc Guéhi i Crystal Palace dhe Nico Schlotterbeck i Borussia Dortmundit. I pari mbetet pa kontratë këtë verë dhe për këtë arsye mund të nënshkruajë një parakontratë brenda dy javësh, por me interesimin e Liverpoolit, Manchester Cityt dhe klubeve të tjera, ai me gjasë do të kërkonte një ofertë shumë më të lartë sesa ajo që lejon struktura e pagave e Barcelonës. Sa i përket Schlotterbeckut, ai mund të përshtatej në strukturën e pagave në kufirin e sipërm, por do të kërkonte gjithashtu një tarifë të konsiderueshme transferimi, duke e bërë edhe më të vështirë realizimin e marrëveshjes./Periskopi/