‘Na duhet Groenlanda’: Trump përsërit kërcënimin për aneksimin e territorit danez

Donald Trump ka propozuar përsëri aneksimin e Groenlandës, pasi udhëheqësi i Danimarkës i kërkoi atij të “ndalojë kërcënimet” mbi ishullin.

Duke folur para gazetarëve, presidenti amerikan tha se “ne kemi nevojë për Groenlandën nga pikëpamja e sigurisë kombëtare”.

Trump ka ngritur vazhdimisht mundësinë që territori gjysmë-autonom danez të bëhet pjesë e aneksuar e SHBA-së, duke përmendur vendndodhjen e tij strategjike për qëllime mbrojtjeje dhe pasuri minerale.

Kryeministri i Groenlandës, Jens Frederik Nielsen, u përgjigj duke thënë “mjaft tani” dhe e përshkroi idenë e kontrollit të SHBA-së mbi ishullin si një “fantazi”.

Ai tha: “Mjaft më me presion. Mjaft me insinuata. Mjaft me fantazi aneksimi. Ne jemi të hapur për dialog. Ne jemi të hapur për diskutime. Por kjo duhet të ndodhë përmes kanaleve të duhura dhe me respekt për të drejtën ndërkombëtare”.

Më parë, kryeministrja e Danimarkës, Mette Frederiksen, kishte thënë se “SHBA-të nuk kanë të drejtë të aneksojnë asnjë nga tre kombet në mbretërinë daneze”.

Frederiksen shtoi se Danimarka “dhe kështu Groenlanda” ishte anëtare e NATO-s dhe e mbuluar nga garancia e sigurisë e aleancës, dhe tha se një marrëveshje mbrojtjeje që u jepte SHBA-ve akses në ishull ishte tashmë në fuqi.

Kryeministrja daneze publikoi deklaratën e saj pasi Katie Miller – gruaja e njërit prej ndihmësve të lartë të Trump, Stephen Miller – postoi në mediat sociale një hartë të Groenlandës me ngjyrat e flamurit amerikan së bashku me fjalën “SË SHPEJTI”.

Ambasadori danez në SHBA iu përgjigj postimit të Miller – një podkaster i krahut të djathtë dhe ish-ndihmës i Trump gjatë mandatit të tij të parë – me një “kujtesë miqësore” se të dy vendet ishin aleate dhe duke thënë se Danimarka priste respekt për integritetin e saj territorial./Periskopi/