Liverpooli ia ‘mbyll’ derën e largimit Chiesës

Liverpool nuk ka asnjë qëllim ta lejojë Federico Chiesan të largohet gjatë afatit kalimtar të janarit, pavarësisht interesimit në rritje nga Napoli dhe Juventusi.

Raportet e fundit kishin lidhur të dy klubet e Serie A me një lëvizje të mundshme në formë huazimi për italianin, me idenë e rikthimit të Chiesas në Itali në mes të sezonit.

Megjithatë, sipas “Sky Sports UK”, përmes “TuttoMercatoWeb”, këto shpresa janë gati të zbehen.

Klubi i Premierligës ka përjashtuar çdo largim në janar, qoftë në formë huazimi apo transferimi të përhershëm.

Liverpooli e sheh anësorin si pjesë të planeve për pjesën e mbetur të sezonit dhe nuk është i gatshëm të miratojë një largim në mes të fushatës.

Situata mund të ndryshojë pas mbylljes së merkatos dimërore.

Liverpool raportohet se është i hapur të diskutojë të ardhmen e tij në një fazë të mëvonshme, por vetëm në kontekstin e një transferimi të plotë dhe jo një marrëveshjeje të përkohshme.

Për momentin, ky skenar konsiderohet i pamundur.

Chiesa iu bashkua Liverpoolit nga Juventusi në verën e vitit 2024 dhe ka kontratë me klubin deri në vitin 2028, me edhe dy vite e gjysmë të mbetura në marrëveshje.

Deri tani këtë sezon, përfaqësuesi i Italisë ka zhvilluar 15 paraqitje në Premierligë, duke shënuar dy gola.

Ndërsa Napoli dhe Juventusi vazhdojnë ta monitorojnë situatën e tij, çdo rikthim në Serie A do të duhet të presë të paktën deri në verë dhe vetëm nëse plotësohen kushtet e Liverpoolit./Periskopi