Super emra pa skuadër: Kush janë yjet që mund të transferohen falas

Edhe pse afati i janarit për transferime është mbyllur, tregu i lojtarëve të lirë vazhdon të jetë i pasur me emra të mëdhenj të futbollit botëror. Nga ish-yje të Premier League te legjenda evropiane, shumë prej tyre janë ende në pritje të një projekti të ri – qoftë për shkak të dëmtimeve, formës fizike apo thjesht zgjedhjes për të pritur ofertën e duhur.

Ja XI-ja ideale e lojtarëve aktualisht pa klub, që mund të përforcojnë menjëherë çdo skuadër:

Në portë është Vicente Guaita, ish-gardiani i Crystal Palace, i cili u largua nga Parma pas vetëm dy muajsh. Edhe pse 39-vjeçar, përvoja e tij mbetet aset i rëndësishëm.

Mbrojtja përbëhet nga Serge Aurier në të djathtë, i liruar nga Persepolis pas një pezullimi, dy qendërmbrojtësit Kurt Zouma dhe Sergio Ramos, si dhe Juan Bernat në krahun e majtë. Ramos, 39 vjeç, synon rikthimin në Evropë dhe ëndërron ende Botërorin 2026, me Sevillën si destinacion të mundshëm.

Mesfusha është një përzierje emrash të njohur: Alex Oxlade-Chamberlain, i cili po stërvitet me Arsenalin dhe lidhet me Celticun, James Rodríguez, pranë një kalimi në MLS, si dhe Jesse Lingard, që pritet të rikthehet në Angli pas aventurës në Korenë e Jugut.

Në repartin ofensiv, Raheem Sterling është emri më i bujshëm, pasi ndërpreu kontratën me Chelsean dhe tashmë është objekt interesimi nga disa klube. Në qendër të sulmit është Michail Antonio, i cili po rikuperohet pas aksidentit të rëndë në fund të vitit 2024, ndërsa në krahun e majtë figurën e kompleton Dimitri Payet, i lirë pas largimit nga Vasco da Gama.

Edhe pse disa prej këtyre lojtarëve janë në fund të karrierës, përvoja, emri dhe cilësia e tyre i bëjnë ende alternativa shumë interesante për klubet që kërkojnë përforcime pa kosto transferimi. Tregu i “free agent”-ëve mbetet i hapur – dhe surprizat nuk përjashtohen. /GazetaExpress